Прекинот на Стратешкиот дијалог „целосно се заснова на постапките на привремената влада на Косово“, изјави портпарол на американскиот Стејт департмент на прашање на весникот „Национале“, остро негирајќи ги коментарите на косовскиот премиер Албин Курти за стратешкиот дијалог.
„Секоја сугестија дека ова има каква било врска со Србија или надворешни актери е неточна и претставува обид да се избегне суштинското прашање“, се вели во писмениот одговор од Стејт департментот до весникот.
Во одговорот се додава дека овие загрижености му се пренесени на Албин Курти.
„И згора на тоа, му го повторивме целосно и јасно ставот на САД. Одлуката за суспендирање на стратешкиот дијалог е целосно заснована на постапките на привремената влада на Косово. Секоја сугестија дека ова е поврзано со Србија или други надворешни актери е неточна и претставува обид да се избегнат клучните прашања. Ја изразивме нашата загриженост директно до премиерот и многу јасно го искажавме ставот на владата на Соединетите Американски Држави. САД секогаш ќе бидат близок пријател на народот на Косово и ние сме целосно посветени на нашето партнерство. Сепак, Соединетите Американски Држави ги охрабруваат нашите партнери да работат конструктивно, за да обезбедат стабилност и безбедност“, нагласил портпаролот во одговорот.
Посочил дека сакаат да ја продолжат соработката со привремената влада.
„Но, потребен ни е партнер кој ја разбира потребата од избегнување на дестабилизирачки дејствија и е посветен на унапредување на регионалната стабилност и заштита на правата на сите граѓани на Косово. Ќе продолжиме да ги оценуваме активностите на привремената влада. Во овој момент немаме ништо друго да објавиме“, додал портпаролот на Стејт департментот за весникот „Национале“.
