Беспилотно летало лансирано од јеменските Хути успеа да го пробие израелскиот противвоздушен штит и да погоди цел во јужниот град Еилат, при што 22 лица беа повредени, соопштија израелските служби за итна медицинска помош.
„Маген Давид Адом“ информира дека сите повредени биле префрлени во болници, а двајца од нив се во тешка состојба поради шрапнели во екстремитетите. Израелската армија потврди дека се обидела да го пресретне дронот, но овој напад претставува редок пробив низ софистицираната воздушна одбрана на земјата.
Хутите, кои имаат поддршка од Иран, презедоа одговорност за нападот, тврдејќи дека кон Израел испукале два дрона. Израелскиот министер за одбрана Израел Кац порача на социјалната мрежа Икс дека „секој што ќе му наштети на Израел ќе биде погоден седум пати посилно“.
Паралелно, израелските сили изведоа серија напади во Појасот Газа. Според локалните болници, најмалку 41 Палестинец бил убиен за само еден ден.
Во напад врз шатори со раселени лица, загинале најмалку 22 цивили, меѓу кои три деца и девет жени, потврди д-р Фадел Наим, директор на болницата „Ал-Ахли“. Израелската војска тврди дека целта биле двајца припадници на Хамас и дека било користено прецизно оружје за да се минимизираат цивилните жртви.
Во бегалскиот камп Нусејрат, друг израелски удар усмрти најмалку 12 лица и повреди 18, а во истата област беа убиени уште четири лица – две деца и нивните родители.
Дополнително, болницата Насер во јужна Газа соопшти дека примила тела на три лица кои биле застрелани додека се обидувале да добијат хуманитарна помош. Канцеларијата на ОН за човекови права предупредува дека стотици цивили биле убиени во последните месеци токму при обиди да обезбедат храна и основни средства за преживување.
