Гутереш: Не треба да се чувствуваме заплашени од израелските закани

Генералниот секретар на ОН, Антонио Гутереш, денес изјави дека светот не треба да се чувствува заплашен од израелските закани за одмазда за признавање на палестинската државност или пропалестинските политики.

„Израелската влада постојано напредува со мерки за целосно уништување на Појасот Газа и спроведување на подмолната анексија на Западниот Брег“, изјави Гутереш за Франс Прес.

Со признавањето на палестинска држава планирано за понеделник на самитот на ОН од страна на Франција и неколку други земји, израелските претставници отворено му се заканија на Париз со дипломатски мерки, како и со анексија на Западниот Брег, кој Израел го окупира од 1967 година.

- Advertisement -

Но, за Гутереш, каков и да е „изговорот“ што Израел го користи за својата политика на палестинските територии или против земјите што покажуваат поддршка за палестинска држава, тоа всушност е „постојана, чекор-по-чекор акција преземена од владата на Израел за да ги спречи Палестинците да имаат држава“.

„Затоа, не смееме да се чувствуваме заплашени од ризикот од одмазда, бидејќи што и да правиме, овие акции ќе продолжат“, рече Гутереш.

„Мислам дека е важно тие (Израел) да се чувствуваат сè повеќе изолирани за да се променат“, додаде генералниот секретар на ОН, страствен поддржувач на решението за две држави и за Израел и за Палестина.

Тој ја опиша можноста за понатамошно признавање на Палестина како „исклучително важен симбол за палестинскиот народ“.

Гутереш повика на прекин на огнот во Похас Гас.

„Она што го гледаме во Газа е ужасно. Тоа е најлошото ниво на смрт и уништување што сум го видел откако станав генерален секретар, веројатно во целиот мој живот“, додаде Гутереш.

„Цврсто верувам дека тоа е морално, политички и правно неприфатливо“, рече Гутереш, одбивајќи да го употреби зборот „геноцид“ во отсуство на судска одлука за ова прашање.