Американскиот претседател Доналд Трамп имаше исклучително напнат телефонски разговор со израелскиот премиер Бенјамин Нетанјаху откако Израел изврши напад врз лидерите на Хамас во Доха.
Според американските претставници, Трамп бил незадоволен бидејќи не бил однапред информиран за операцијата, туку ја дознал веста дури откако нападот веќе започнал, преку американската војска, а не од израелските партнери.
„Зошто не знаев за тоа“, го праша видливо лутиот американски претседател израелскиот премиер.
Тој му рече дека одлуката за напад на територијата на сојузник на САД, кој е и клучен посредник во преговорите за завршување на војната во Газа, била непромислена. Нетанјаху, според „Волстрит џурнал“, објавен од „Скај њуз“, одговорил дека имал многу кратко време да реагира и решил да го искористи.
Хамас набрзо објави дека неговите врвни политички претставници го преживеале нападот, иако шест пониски функционери беа убиени. Катар, кој одигра важна улога како посредник во преговорите меѓу САД, Израел и Хамас во последните месеци, веднаш по нападот прекинаа преговорите за прекин на огнот.
Во мај, Трамп го посети Катар, каде што ги пофали лидерите на земјата, а за возврат доби луксузен авион вреден 400 милиони долари што ќе служи како Air Force One. Катар, исто така, најави отворање на голф-центар што го носи неговото име.
Аналитичарката Мона Јакубијан од Центарот за стратешки и меѓународни студии во Вашингтон рече дека нападот сериозно ја поткопува мировната агенда на Трамп, но додаде дека самиот претседател носи дел од одговорноста за неговиот непредвидлив пристап, за кој вели дека ги охрабрува другите да дејствуваат независно.
И покрај притисокот од Вашингтон, Нетанјаху не покажува знаци на попуштање. Во видео обраќање, тој им порача на Катар и на другите земји за кои тврди дека го засолнуваат Хамас или да ги протераат терористите или самиот Израел ќе ги изведе пред лицето на правдата.
Од една страна, Трамп бара брз крај на конфликтот и ослободување на заложниците, но од друга страна, тој продолжува да ја поддржува воената кампања на Израел против Хамас. Иако потезите на Нетанјаху честопати го ставаат во незгодна позиција со меѓународните сојузници, американскиот претседател сè уште го нарекува најдобриот пријател што Израел некогаш го имал во Белата куќа.
