Остатоци од украински дронови предизвикале пожар во нафтена рафинерија во рускиот Волгоград, изјави гувернерот на градот во четвртокот, објави Ројтерс.
„Лукоил“, компанијата сопственик на рафинеријата, сè уште не одговорила на барањето на Ројтерс за коментар за нападот.
Уништени 46 украински дронови
Воздушната одбрана пресретнала и уништила 46 украински дронови над руски региони и над Азовското Море изминатата ноќ, соопшти руското Министерство за одбрана, објави ТАСС.
Остатоци од дрон паднале на покривот на станбена зграда во јужниот руски град Волгоград. Остатоци паднале и во дворовите на 4 станбени згради во градот Славјанск-на-Кубан.
Според руското Министерство за одбрана, 15 дронови биле соборени над Брјанската област, 11 над Волгоградската област, 7 над Ростовската област, 5 над Краснодарската област, по два над Белгородската и Воронежската област, уште 2 над Крим и два над Азовското Море.
Остатоци од дрон паднале на покривот на зграда
Остатоци од дрон паднале на покривот на 16-катна станбена зграда во Волгоград; жителите биле евакуирани, изјави регионалниот гувернер Андреј Бочаров.
14 лица сè уште се наоѓаат во привремен центар за сместување, соопшти градската администрација.
Зградата се прегледува, воведени се привремени промени во работата на локалниот јавен превоз.
Остатоци од дрон паднале и во дворовите на 4 станбени згради и на околните површини во градот Славјанск-на-Кубан, без жртви, соопшти кризниот центар на Краснодарската област.
На 2 згради им биле оштетени прозорците, а била прекината и електричната линија. Покривот на уште една зграда и помошни објекти, исто така, биле оштетени.
Кризниот центар претходно соопшти дека комбе „ГАЗела“ се запалило од паднати остатоци од дрон. Пожарот бил изгаснат, а жртви нема.
