Мицкоски ги предупредува гласачите и политичарите да не паѓаат во замката на ДУИ

Премиерот и лидерот на ВМРО-ДПМНЕ Христијан Мицкоски очекува предизборната кампања за локалните избори да се води околу реални проекти, но, како што вели, ДУИ наместо да зборува за иднината, „нѐ враќа 30 години наназад“ и наметнува теми од минатото.

– Очекувам кампања со идеи, со планови за нови училишта, спортски сали, автопати… но очигледно, ДУИ заедно со дел од опозициските структури и блиските медиуми, се обидуваат да наметнат атмосфера во која гласачите, особено тие што не се Албанци, ќе се плашат за кого да гласаат. Целта им е – или да гласаат за ДУИ, или воопшто да не гласаат за Вреди. Сакаат да ги обесхрабрат поддржувачите на коалицијата Вреди, односно целта им е да ги натераат гласачите да си речет: „сите се исти, не гласаме“ – рече Мицкоски.

Тој предупреди дека ДУИ „игра на картата на кратко помнење“ и повика граѓаните да направат избор меѓу, како што рече, концептот кој повеќе од 20 години ја уништувал државата и концептот кој сака да гради иднина.

- Advertisement -

– Ќе паднеме ли во нивната замка и ќе коментираме теми од пред 20 години, или ќе зборуваме за нови спортски сали, нови автопати и училишта? Погледнете ги кандидатите што ги нуди ДУИ и кандидатите што ги нуди владината коалиција. Тие се виновни што голем дел од младите Албанци ја напуштија државата“, порача лидерот на ВМРО-ДПМНЕ.

Мицкоски се осврна и на неодамнешната изјава на вицепремиерот Изет Меџити, дека војната во 2001 година била „разумна и праведна“.

– Не се согласувам со тоа. Не може да биде разумно од заседа да се убиваат македонски полицајци. Тоа се теми од минатото, затворени со Рамковниот договор. Нашиот фокус е иднината. Апелирам до сите разумни политичари да не играат на картата на ДУИ, туку да носиме инвестиции и да го направиме ова место подобро за живеење. Политичарите што делеа во минатото – немаат иднина – изјави Мицкоски.

Тој изрази увереност дека владината коалиција ќе биде апсолутен победник на претстојните локални избори.