Грчката полиција верува дека клучни снимки од надзорни камери би можеле наскоро да откријат важни докази за смртта на девојчето пронајдено на плажата Едем во јужна Атина – случај што сè уште е обвиен со мистерија и четири дена по трагичниот настан на 27 јули, објави порталот Keep Talking Greece.
Властите внимателно ги анализираат видеата од надзорните камери во областа Палаио Фалиро, кои се сметаат за клучни за расветлување на случајот. Истражувањата што ги спроведуваат припадниците на крајбрежната стража се движат во сите насоки, а речиси 5 дена подоцна, телото на девојчето сѐ уште не е побарано од никого.
„Намерен чин“ се разгледува како една од можните опции.
Жената – „клучна фигура“ на снимките
Посебно внимание властите им посветуваат на 2 снимки од безбедносни камери во областа, на кои се гледа жена како турка количка со дете облечено во костим за капење, кој многу личи на скапото и уникатно едноделно костимче што го носеше девојчето кога беше пронајдено мртво.
На една снимка, направена неколку часа пред телото да биде пронајдено, жената се гледа како оди по булеварот Посејдонус, кој се протега паралелно со плажата Едем. Со неа имало уште две деца што оделе покрај неа, а третото било во количка, според извештаите на грчките медиуми.
Жената била замотана во дебела облека, и покрај жешкото време и топлотниот бран тие денови.
Облеката што ја носело детето во количката била речиси идентична со костимот за капење што го носело четиригодишното девојче кога беше пронајдено.
Втора снимка: празна количка
Втората снимка, направена неколку часа подоцна, ја прикажува истата жена со двете деца, наводно момчиња, што одат и со празна количка, која подоцна ја остава во грмушка.
Според сознанијата на некои медиуми, жената ја оставила количката во грмушка на тротоарот на булеварот Посејдонус, зад автобуска постојка, и потоа чекала автобус во насока кон Атина или кон Пиреја.
Костимот за капење не се продава во Грција – потекло на девојчето
Во средата, полицијата објави фотографија од едноделниот костим за капење што го носеше девојчето, појаснувајќи дека тој е произведен во Бразил и дека не се извезува, ниту може да се купи преку интернет.
Врз основа на снимките, властите претпоставуваат дека детето во количката било полусвесно, нешто што, ако се потврди, се совпаѓа со заклучокот на судскиот вештак, кој утврди дека девојчето се удавило многу блиску до плажата, откако вдишало песок и вода што биле пронајдени во неговите бели дробови при обдукцијата.
Неусогласености околу времето на смртта
Во медиумските извештаи постојат несогласувања околу времето на смртта. Според судските вештаци, девојчето покажувало знаци на давење, но телото не покажувало типични знаци на подолг престој во вода. На пример, набраноста на кожата – што е вообичаено по подолг контакт со вода – била минимална, што укажува дека телото било во вода само 1 до 2 часа. Сепак, се проценува дека времето на смртта било меѓу 20 и 30 часа пред телото да биде пронајдено, што отвора прашања каде било чувано детето во тој период.
Снимката била направена неколку часа пред телото да биде откриено, а властите сметаат дека може да биде пресудна за истрагата.
Се бара таксистот
Истражителите на случајот продолжуваат со обиди да го идентификуваат таксито во кое се качила непознатата жена со децата, користејќи дополнителни снимки од надзорни камери во околината и трагајќи по возачот кој би можел да помогне да се утврди нејзината дестинација.
Во анализата на втората снимка, било забележано дека жената го носела фустанот обратно, што ги навело истражителите да претпостават дека се облекувала набрзина, со намера да си замине што е можно побрзо од местото.
Фотографијата, за која постои основано сомневање дека го прикажува истото девојче чиешто тело беше пронајдено во недела наутро, исто така предизвикува загриженост. Детето било со шешир кој целосно го покривал лицето, иако снимката е направена во вечерните часови, околу 21:30. Начинот на кој било сместено во количката укажува дека можеби спиело, но не се исклучуваат и други состојби.
Постојат сомнежи дека девојчето можеби имало хронично здравствено нарушување, а истражителите разгледуваат и можноста топлотниот бран да влијаел врз одлуката на мајката да ги одведе децата на плажа доцна навечер. Интересно е што само девојчето било облечено во костим за капење.
Вистинската возраст и потекло
Во вторникот, властите објавија дека девојчето било постаро одошто првично се мислело – не 2 или 3, туку 4 години.
Исто така, проценија дека девојчето потекнува или од земјите на Северна Африка, како Алжир или Мароко, или од Блискиот Исток, како Сирија.
Случајот добива нови димензии
Случајот добива нови димензии откако крајбрежната стража и полицијата собраа информации што укажуваат дека настаните најверојатно се случувале на копно, покрај крајбрежната зона. Во моментов се исклучува можноста детето да паднало од брод или од чамец, иако, ниедна можност не се отфрла целосно сѐ додека случајот не се расветли.
Снимките од безбедносните камери можете да ги погледнете ТУКА.
