Најсериозни жаришта кај Нивичино, во Македонски Брод и кај Василево

На територијата на Македонија во неделата, 20 јули 2025, до 20:30 часот, беа евидентирани вкупно 20 пожари на отворен простор, соопшти Центарот за управување со кризи (ЦУК). Од нив, 5 сè уште се активни, 3 се ставени под контрола, а 12 се целосно изгаснати, соопшти Центарот за управување со кризи (ЦУК).

Најсериозните пожари што и понатаму се активни се на територијата на Василево, каде што гори нискостеблеста шума и трева кај селото Нивичино, како и во општина Македонски Брод, каде има 2 одделни пожара – едниот кај селото Грешница, а другиот се шири меѓу селата Црешнево, Локвица и Крапа, опфаќајќи деградирана дабова шума и густа ниска вегетација.

Активни пожари има и кај Прилеп, помеѓу селата Царевиќ и Смолани, како и во ресенскиот регион, каде што се проширува пожар меѓу селата Покрвеник, Перово, Асамати и Наколец, зафаќајќи трска и сува трева.

- Advertisement -

Три пожари се ставени под контрола, меѓу кои е и оној на планината Жеден кај Желино, каде што гореа ниска вегетација и грмушки. Пожарот во велешкиот регион, помеѓу селата Џидимирци, Крушје и Иванковци, каде што беше зафатена деградирана шума, е исто така под контрола. Во струшкиот крај, пожарот помеѓу Октиси и Белица, кој зафати сува трева, е ставен под надзор.

Според ЦУК, 12 пожари се успешно изгаснати во изминатите часови. Меѓу нив се оние во Студеничани, Селце кај Крушево, Бунеш кај Пробиштип, неколку точки во Кратово и Ранковце, како и пожар во депонијата во Гостивар. Изгаснати се и пожари со стрништа, ниска шума и сува трева во региони низ целата земја – од Куманово и Липково, до Маврово-Ростуше и Виница.

ЦУК продолжува со следење на состојбата и апелира до граѓаните да бидат внимателни и да не палат отворен оган во природа.