Килибарот им донесе богатство на туристите во Полска

И покрај дождливото и свежо време кое повеќе потсетуваше на есен отколку на лето, минатиот викенд плажите во северна Полска беа преплавени од луѓе – не за капење, туку во потрага по нешто многу повредно: балтички килибар.

По силната бура, морските струи исфрлија на бреговите големи количини од ова скапоцено „морско злато“, а видеа објавени на социјалните мрежи покажуваат луѓе кои собираат транспарентни парчиња во нијанси од жолта, па сè до ретки црвени и сини бои. Плажата во Пжебрно, во близина на Гдањск, стана вистинско златоносно поле.

„Неверојатно! Каква берба во јули! Некои едноставно имаат среќа!“, беше еден од коментарите на воодушевени корисници.

- Advertisement -

Килибарот, фосилизирана смола стара милиони години, лесно плови на површината и по невреме завршува на песочните брегови. Ова го прави совршено време за лов – особено кога плажите се празни поради дождливото време.

Пазарната вредност на балтичкиот килибар постојано расте. Мал примерок од 1 грам се продава меѓу 46 и 70 евра, додека парчиња од 200 грама достигнуваат дури до 5.000 евра. Според проценките, цената на оваа природна скапоценост се зголемува годишно за 5 до 10 проценти. Причината? Огромната побарувачка, особено од Кина, каде балтичкиот килибар се цени многу повеќе од кинескиот или бурманскиот.

Се чини дека полските плажи веќе не се само дестинација за летен одмор – туку и за сериозен лов на природни богатства.