Туристите на островот Тасос во Грција се евакуираат откако синоќа, 9 јули, околу 23 часот изби гoлем пожар во местото Гликади

Туристите на островот Тасос во Грција се евакуираат откако синоќа, 9 јули, околу 23 часот изби гoлем пожар во местото Гликади. Засега станбените делови на островот не се во опасност, но е зафатена голема шумска површина со борови. Сепак, многу туристи, вклучително и Срби на одмор, испаничија и се упатија кон пристаништето во Лименас, објавија грчките медиуми.

Првиот ферибот во зори од Лименас до пристаништето Керамоти исплови натоварен со патници, додека патот од Пахис до Лименас е затворен и на возачите им се препорачува да изберат алтернативни рути поради редовите што се формирале, пренесува српски Мондо.

- Advertisement -

Алтернативна рута за возачите кои се во Принос, Калирак или Мариес е преку Лименарија-Потос-Потамија и Панагија за да стигнат до Лименас. Најавени се кратки прекини на електричната енергија. Некои места на островот веќе останаа без струја.

Еден од плажните барови на плажата Гликади изгоре целосно. Хотел во областа Пачи беше евакуиран како мерка на претпазливост.

Градоначалникот, Лефтерис Киријакидес, на Фејсбук повика да не се создава паника уверувајќи дека службите работат на гасење на пожарот.

„Ве молам престанете со публикациите што шират паника. Тие создаваат паника кај жителите и посетителите без никаков значаен резултат. Целиот Тасос е обединет на првата линија на битката. Потребна е мирна и координирана акција“, се вели во објавата.

Првиот авион пристигна во Тасос во 5:50 часот наутро за да помогне во гаснењето на пожарот. Засилени противпожарни и полициски сили, како и волонтери, слетаа во Лименас помеѓу 14 и 16 часот.

На групата „Грчка инфо“ на Фејсбук е објавено дека, според жителите на островот, пожарот избил во близина на хотел во Гликади.

„Волонтерите бараат засилување, а пожарникарите од Кавала се упатија кон островот за да помогнат во гаснењето на пожарот бидејќи противпожарните авиони не можат да летаат ноќе. Некои места на Тасос останаа без струја“, објавува страницата.

Во Грција активен е и пожарот во делот на Дојран кој премина од македонска страна и пожар кај Атина.