Во Шпанија завладеа тага, а во Португалија и Ливерпул болка и неверување откако познатиот фудбалер Диого Жота (28) трагично го загуби животот во сообраќајна несреќа заедно со својот брат Андре (26), додека биле на одмор. Несреќата се случила во покраината Замора, каде што автомобилот во кој се наоѓале излетал од патот и се запалил.
Според шпанските власти, причина за несреќата била пукната гума. Автомобилот веднаш по ударот се запалил, а пламените јазици го проголтале возилото за неколку минути. Екипите за итна помош кои пристигнале на теренот не можеле ништо да направат освен да ја констатираат смртта на двајцата браќа.
Енфилд во солзи: Илјадници фанови се збогуваат со Жота
Сцените пред стадионот „Енфилд“ се полни со емоции. Навивачи од сите генерации палат свеќи, оставаат цвеќиња, дресови и пораки во чест на Диого Жота.
„Ти беше нашиот борец“, „Никогаш нема да одиш сам“ – се само дел од пораките што го облеваат познатиот стадион со тага и љубов.
Жота, кој пред само две недели се ожени со својата долгогодишна партнерка Руте Кардосо, зад себе остави сопруга и три деца. Неговата последна објава на социјалните мрежи, видео од медениот месец, сега добива нова, потресна димензија.
