Најмалку тројца загинаа, а 16 лица се повредени во масовна престрелка што се случила доцна во ноќта во Чикаго, САД, за време на забава за промоција на албум на раперот Мел Бакз. Трагичниот инцидент се случил во ресторан и салон на авенијата Вест Чикаго, во областа Ривер Норт, каде што се одржувала приватна забава.
Како што јавува „CBS“, повикувајќи се на локалните власти, вкупно 19 лица биле застрелани, од кои тројца починале на самото место или во болница. Според извештајите, жртвите се застрелани додека се наоѓале во автомобили во движење, што укажува на добро планирана и насочена акција.
Портпаролот на полицијата во Чикаго, Хулио Гарсија, изјави дека дополнителни детали ќе бидат објавени во наредниот период, но засега не е прецизирано дали напаѓачите се идентификувани или уапсени.
Во изјава за Ројтерс, Гарсија додаде дека истрагата е во тек и се проверуваат безбедносните камери и изјавите на сведоци.
Од болницата Нортвестерн, портпаролот Крис Кинг потврди дека одделот за итни случаи е во состојба на зголемена мобилизација, бидејќи примиле неколку повредени од пукањето, но не можел да го прецизира нивниот точен број или моменталната здравствена состојба.
Пукотниците се случиле на забава посветена на издавањето на нов албум на раперот Мел Бакз, чија музика неретко опфаќа теми поврзани со насилство, улични банди и општествена неправда. Засега не е познато дали самиот рапер бил присутен на настанот или цел на нападот.
Жителите на областа Ривер Норт изразија загриженост, барајќи од властите поостри безбедносни мерки и зголемено полициско присуство.
