Хамас е задоволен од уверувањата, вклучени во новиот предлог за примирје кој има за цел да стави крај на осуммесечната војна во Газа, јавува саудискиот медиум Ашарк, повикувајќи се на висок извор, објави Тајмс оф Израел.
Предлогот, кој бил испратен преку посредници, гарантира дека двете страни нема да ги обноват борбените дејствија додека траат преговорите.
Според истите извори, претседателот на САД, Доналд Трамп, ќе го објави договорот откако ќе биде финализиран и ќе ја преземе улогата на главен политички спонзор на неговата имплементација.
Симболично разоружување на лидери на Хамас во странство
Како гест на добра волја и симболично приближување кон израелските барања, високи членови на Хамас, кои живеат во странство, биле повикани да ги предадат своите лични оружја, објави Тајмс оф Израел.
Според извештајот, иницијативата дошла од катарските посредници и треба да покаже отвореност на Хамас за политичко решение. Меѓу оние кои биле повикани да го сторат тоа се Калил ал-Хаја, главен преговарач и член на политбирото на Хамас; Захер Џабарин, лидер на Хамас за Западниот Брег со седиште во Истанбул; Мухамад Исмаил Дарвиш, претседател на Советот Шура на Хамас.
Овој потег е симболичен бидејќи Хамас досега упорно го одбива целосното разоружување како услов за траен мир.
Што содржи најновиот предлог за примирје?
Весникот Ал-Ахбар од Либан објави дека предлогот за примирје, што се разгледува од Хамас, се заснова на три главни точки:
- Израелската војска да се повлече на позициите што ги држела пред 2 март, кога пропадна претходното примирје. Тоа подразбира напуштање на позициите долж „Филаделфија коридорот“ во Рафа.
- Реинсталирање на механизмот на Обединетите нации за хуманитарна помош, со цел непречено доставување храна, лекови и други потреби. Не се споменува директно „Газа Хуманитарна Фондација“, поддржана од САД и од Израел, што може да значи нејзино исклучување.
- Продолжување на преговорите дури и по почетокот на примирјето, дури и ако дотогаш не е постигнат целосен договор за траен мир.
Одговорот од Хамас се очекува в петок
Иако извештаите укажуваат на позитивен тон од страна на Хамас, друг извор блисок до организацијата за Ашарк изјавил дека новиот предлог е речиси идентичен со претходниот, составен од американскиот посредник Стив Виткоф, со само мали технички измени.
Формалниот одговор на Хамас се очекува до петок, по што можно е јавна објава од страна на Трамп, со што би започнало спроведување на примирјето – доколку и Израел даде зелено светло.
Воената операција започна на 7 октомври 2023 година, откако Хамас изврши напад врз Израел при што беа убиени 1.200 луѓе и киднапирани 251 лице. Според Министерството за здравство на Хамас, повеќе од 57.000 Палестинци досега загинале во израелските одмазднички акции.
