Падна бизнисменка од Кавадарци

Управата за финансиска полиција неодамна достави кривична пријава до Основното јавно обвинителство Кавадарци против С.Т., сопственичка и управителка на компанијата „Руж Експорт ДООЕЛ Кавадарци“. Обвинението тежи сериозно: даночно затајување што ја чинело државната каса над 50 милиони денари или над 800.000 евра.

Што всушност се случувало? Од документите и спроведените проверки произлегува дека С.Т., во периодот од почетокот на 2013 до крајот на 2018 година, газела по опасен терен. Наместо да набавува трговска стока преку вообичаени канали и да ја евидентира во складните книги на фирмата, таа, според сомневањата, купувала стока директно од физички лица, на зелени пазари, плаќајќи во кеш.

Каде е проблемот? Тие количини на стока никогаш не завршувале во официјалната залиха на „Руж Експорт“. А потоа, без многу колебање, компанијата издала речиси 3.000 фактури и изјави за потекло на земјоделски производи – кои служеле како пропусница за извоз. Стоката се извезувала кон Албанија, Србија, Црна Гора, Косово, па дури и во Русија, преку 14 различни царински испостави. Вкупната сума? Над 500.000 денари.

- Advertisement -

Но тука не застанува приказната. За целиот овој промет не бил пресметан ниту денар данок на добивка. Штетата за државата, според финансиската полиција, надминува 50 милиони денари. Пари кои требало да завршат во Буџетот, а останале во приватни џебови.

За да ги замагли трагите, С.Т. поднесувала завршни сметки до Централниот регистар и УЈП за 2013, 2014, 2015 и 2016 година – но тие биле со, како што се наведува, „невистинити податоци“. А потоа, од 2017 година па натаму, едноставно престанала да поднесува завршни сметки. Последица? Компанијата од 2020 година официјално има статус на избришан субјект, согласно законот за трговски друштва.

И тоа не е сè. Според пријавата, целата книговодствена документација на „Руж Експорт“ е свесно уништена. Така, дури и да сакале истражителите да го реконструираат текот на парите или на залихите, би наишле на празни полици и на уништени папки.