Израелската армија употреби бомба од 230 килограми во нападот врз кафуле во Газа во понеделникот, а експертите велат дека употребата на таква муниција може да претставува воено злосторство

Израелската армија употреби бомба од 230 килограми во нападот врз кафуле во Газа во понеделникот, а експертите велат дека употребата на таква муниција може да претставува воено злосторство, објави денеска Гардијан.

Експертите за меѓународно право изјавија дека употребата на неселективно оружје, кое генерира масивен експлозивен бран и расфрла шрапнели на широка површина, може да претставува воено злосторство поради присуството на голем број незаштитени цивили, вклучувајќи деца, жени и постари лица.

Фрагменти од оружје од урнатините на кафулето Ал-Бака, фотографирани од Гардијан, се идентификувани од експерти за оружје како делови од бомба за општа намена МК-82 од 230 килограми.

- Advertisement -

Големиот кратер, оставен од експлозијата, дава дополнителни докази за употребата на голема и моќна бомба како што е МК-82, изјавија двајца експерти за оружје.

Портпарол на Израелските одбранбени сили (ИДФ) изјави дека нападот врз кафулето се истражува и дека „пред нападот се преземени чекори за намалување на ризикот од штета на цивилите преку употреба на воздушен надзор“.

Медицински и други претставници изјавија дека меѓу 24 и 36 Палестинци биле убиени во нападот врз кафулето, а десетици биле повредени.

Израелски напади убија околу 30 луѓе во изминатиот ден

Израелски напади убија речиси 30 Палестинци во Појасот Газа во текот на изминатите 24 часа, објави ДПА, повикувајќи се на локалните власти контролирани од палестинската група Хамас, која е во војна со Израел. Десетици лица се повредени, соопшти агенцијата.

Во најновиот голем напад синоќа, најмалку 10 лица беа убиени, а повеќе од 50 беа повредени, соопшти персоналот во болницата Наср во јужниот град Кан Јунис.

Шесте жртви се членови на едно семејство. Беше погоден шаторски камп за внатрешно раселени жители на енклавата во областа Ал-Маваси, во близина на Кан Јунис.

Претходно во средата, најмалку 17 лица беа убиени во напад во областа Зејтун во истоимениот главен град во Појасот Газа.

Војната во Појасот Газа започна на 7 октомври 2023 година, кога исламистичкото движење Хамас изврши изненадувачки прекуграничен напад на израелска територија.

Според израелските податоци, во тој момент биле убиени околу 1.200 луѓе, а 251 заложник биле земени.

Според информациите од Министерството за здравство на Хамас, бројот на убиени Палестинци во енклавата во израелската одмаздничка офанзива сега надминал 57.000.