Претседателот на Советот на Општина Охрид, Перчо Божиноски во придружба на Заменик министерот за економија и труд, Маријан Ристески присуствуваше на Информативниот ден за Оперативниот план за вработување на Владата на Република Македонија што денес се одржа во Охрид.
Претседателот на Совет, Перчо Божиноски го поздрави Владиниот Оперативен план за вработување, а укажа и на активностите што општината ги презема со цел да се намали бројот на невработени лица.
-Денешнава средба е исколучително важна и е во насока на поголемо и поквалитетно вклучување на невработените лица на пазарот на труд во Македонија. Активните мерки и програми за вработувањеќе бидат теми на дискусија и верувам дека сите заедно ќе донесеме заклучоци со цел бројот на работно ангажирани луѓе кои ќе земаат постојан месечен надомест ќе расте.
Овој настан е пример за добрите врски и соработка на централната и локална власт кои заеднички настапуваат и одговараат на различните потреби на работна сила на пазарот на труд и бизнисот.
Општината во неколку наврати имала слух и ги отворила вратите обучувајќи средношколци од економската струка кои на тој начин се стекнуваат со непроценливо важни искуства кои ќе им бидат златен билет при вработување. Ја поздравувам и одличната соработка помеѓу меѓу менаџментот на ОЕМУЦ „Св. Наум Охридски“ и компанијата “Костал“ која работно ангажира ученици од ова училиште. Станува збор за битни мерки кои имаат непроценлива вредност за нашата младина.
Она што ни е потребно, а е во насока на намалување на бројот на невработени лица е оживување на старите занаети, кувенџиство, шапкарство , опинчарство, филигранство. За жал живееме во време кое кубури со занаетчии. На една рака се бројат лицата кои по дома поправаат електрични уреди , а ни се потребни на сите нас. Тука се молери, плочкари, дограмаџии. Затоа топло ги советувам младите охриѓани добро да размислат кога ќе носат одлука за својата животна професија. Нека го изберат она што сакаат да го работат и што ќе ги исполнува, а секако да ги разгледаат и потребите на пазарот на труд- рече Божиноски.
На настанот се обрати и Заменик министерот за Економија и труд, Маријан Ристески, претставници од Агенцијата за вработување и Агенцијата за поддршка на претприемништвото. Присутни беа претставници од Здружението на занаетчии од Охрид од општинската организација на млади и останати чинители од општествениот живот во градов.
