За време на фестивалот на улична музика „Fête de la Musique“, што се одржа низ цела Франција, во полицијата беа пријавени 145 повреди од убод со игла, а 12 лица беа уапсени.
Милиони луѓе во Франција излегуваат на улиците секоја година за да уживаат во улична музика, што создаде невидени толпи на улиците на Париз и други градови.
Пред почетокот на фестивалот, објавите на социјалните мрежи повикуваа на напади врз жени, објавува „The Guardian“. Париската полиција пријави 13 случаи во главниот град.
Службениците не кажаа дали случаите вклучуваат таканаречени повреди од убод со игла со лекови за силување како што се „Rohypnol“ или „GHB“, кои напаѓачите ги користат за да ги збунат или да ги онесвестат жртвите пред сексуално да ги нападнат.
„Некои жртви беа однесени во болница на токсиколошки тестови“, соопшти министерството.
Во Париз е покрената истрага откако три лица, меѓу кои 15-годишно девојче и 18-годишен маж, пријавиле дека биле избодени со шприцеви во одделни инциденти низ Париз, соопштија обвинителите. Сите тројца изјавиле дека се болни, објави tportal.
Дванаесет осомничени се уапсени во Франција поради нападите со шприцеви, соопшти Министерството за внатрешни работи. Меѓу нив се и четворица во југозападниот град Ангулем, за кои се сомнева дека нападнале околу 50 жртви, изјави полициски извор. Покрај осомничените, повеќе од 370 лица беа приведени за време на фестивалот по разни обвиненија, вклучувајќи речиси 90 лица во Париз.
Четиринаесет посетители на фестивалот беа сериозно повредени, вклучувајќи и 17-годишник кој беше хоспитализиран откако беше пронајден како седи на улица со убодни рани во долниот дел на стомакот.
Тринаесет полицајци беа исто така повредени, но префектот на париската полиција, Лоран Нуњез, рече дека „не е пријавен никаков поголем инцидент“.
