Два големи шумски пожари избувнаа на грчките острови Хиос и Евија, предизвикувајќи паника, масовни евакуации и вонредна мобилизација на противпожарните сили

Два големи шумски пожари избувнаа на грчките острови Хиос и Евија, предизвикувајќи паника, масовни евакуации и вонредна мобилизација на противпожарните сили. Додека на Хиос беа евакуирани шест населени места, на Евија беше испразнет хотел како превентивна мерка.

Високите температури и силниот ветер ја влошуваат ситуацијата и го отежнуваат гаснењето на пламените јазици кои брзо се шират. Градоначалниците и надлежните служби предупредуваат дека борбата со огнената стихија е далеку од завршена.

Поради шумскиите пожари кои избувнаа на грчкиот егејски остров Хиос, беше извршена евакуација на шест населени места, објави грчкиот весник „Катимерини“. Ситуацијата е критична, а локалните власти водат трка со времето за да ги заштитат жителите од огнената стихија.

- Advertisement -

Жителите во областа Агиос Макариос Вронтадос добија итна тревога преку државниот алармен систем 112, со која им беше наредено веднаш да се евакуираат и да се упатат кон плажата Вронтадос, каде што се организираше пречек и евакуација преку море.

Освен Вронтадос, властите наредија итна евакуација и на областите Парифес, Јалурика, Панагија Воитеја, Агиос Пантелејмонас и Кастроминас. Жителите се евакуираат со помош на копнени и морски тимови.

Градоначалникот на Хиос, Јанис Малафис, во изјава за „Катимерини“ рече дека ситуацијата е сериозна, бидејќи огнот беснее на три одделни фронта, секој на значително растојание од другите, што дополнително ја усложнува координацијата на интервентните тимови.

– Ситуацијата е многу тешка, а ветровите се исклучително силни. Хеликоптерите работат, но под тешки услови. Нашите тимови се борат, а жителите се транспортираат до безбедни зони – изјави Малафис.

Во исто време, шумски пожар избувна и на грчкиот остров Евија, во близина на Атина. Како превентивна мерка, властите евакуираа еден хотел, а противпожарните тимови се обидуваат да ја стабилизираат ситуацијата пред да се прошири.

Грчките власти апелираат за максимална претпазливост и следење на сите упатства, додека во тек се интензивни напори за локализирање на пожарите.