Трамп ѝ честиташе на Полска за изборот на Навроцки: „Избравте победник“

Претседателот на САД, Доналд Трамп, денес ѝ честиташе на Полска за изборот на историчарот Карол Навроцки за претседател.

„Честитки до Полска, избравте победник“, напиша американскиот претседател на својот профил на социјалните мрежи Truth Social, прикачувајќи го она што го опиша како наслов на Newsmax, кој гласеше „Сојузникот на Трамп победи во Полска, шокирајќи ја цела Европа“.

Во вториот круг од изборите во неделата, Полјаците го избраа 42-годишниот Карол Навроцки за претседател, историчар со хулиганска младина, претседател на Институтот за национално сеќавање, поранешен боксер чија политичка инспирација е американскиот лидер Доналд Трамп и движењето MAGA. По пребројувањето на гласовите од сите избирачки места, Државната изборна комисија објави дека Навроцки, кандидатот на конзервативните популисти од партијата „Закон и правда“, освоил 50,89 проценти од гласовите, а кандидатот на владејачката коалиција, либералниот проевропски градоначалник на Варшава, Рафал Чашковски, освоил 49,11 проценти.

- Advertisement -

Изборите ја поделија Полска на два спротивставени еднакви табора, бидејќи следбеникот на американскиот претседател Трамп беше избран со тесно мнозинство од само 370.000 гласови од вкупно 28,9 милиони гласачи.