Најмалку 33 лица загинаа, а десетици се повредени во израелско бомбардирање на училиште во Газа утрово, објави Цивилната одбрана на Појасот Газа за новиот број на жртви.
Бројот на жртви во „масакрот во училиштето Фахми ал-Џарџауи во Газа Сити се искачи на најмалку 33, а десетици се повредени, претежно деца и неколку жени“, изјави за АФП портпаролот на хуманитарната група Махмуд Басал.
Израелската војска утрово соопшти дека бомбардирањето на училиште во Газа било насочено кон „високо рангирани терористи“.
Војската соопшти дека целите биле „високо рангирани терористи кои дејствуваат во командниот и контролен центар на Хамас и Исламски џихад, сместен во област која претходно служела како училиште“.
Цивилната заштита соопшти дека во вториот напад утрово 19 лица се убиени во израелски воздушен напад врз куќа во Џабалија, на север од опколената палестинска територија.
„Нашите тимови префрлија 19 маченици од масакрот на семејството Абд Рабо во болница, откако воени авиони рано утрово нападнаа куќа во градот Џабалија“, рече Басал.
Кон средината на март, по двомесечно примирје, Израел ја продолжи својата офанзива врз Појасот Газа и ги интензивираше воените операции на 17 мај, со цел уништување на палестинското движење Хамас, ослободување на преостанатите заложници и преземање на контролата врз територијата.
Во нападот на Хамас во Израел на 7 октомври 2023 година, на израелска страна загинаа 1.218 луѓе, повеќето од нив цивили, според пресметката на АФП врз основа на официјални бројки.
Од 251 лице киднапирано тој ден, 57 останаа во Газа, од кои најмалку 34 се мртви.
Речиси 54.000 жители на Газа, претежно цивили, се убиени во израелската воена кампања, според бројките од Министерството за здравство на Газа, кое е под контрола на Хамас, кои ОН ги смета за веродостојни.
