Палестинските спасувачи соопштија дека најмалку 20 лица се убиени во израелски напад врз училиште во Газа кое служело како засолниште за раселени Палестинци. Според израелската војска, во поранешното училиште се наоѓал контролен центар на палестинското исламистичко движење Хамас.
Портпаролот на палестинската цивилна одбрана, Махмуд Басал, изјави дека најмалку 20 лица, претежно деца, се убиени, а 60 други се ранети во напад врз училиште во Газа. Во времето на нападот, во зградата каде што се засолниле раселените Палестинци имало неколку стотици луѓе.
Израелската војска соопшти дека „ги погодила клучните терористи кои дејствуваат во командниот и контролен центар на Хамас и Исламски џихад во област која претходно служела како училиште“. Тие додадоа дека претходно презеле голем број мерки за намалување на ризикот за цивилите.
Претходно, израелската армија изврши воздушен напад врз куќа во Газа Сити, при што загинаа најмалку четири лица, јавува британскиот Би-Би-Си.
Еден ден претходно, најмалку 22 лица беа убиени, а десетици други беа повредени во израелските напади на палестинските територии.
По речиси тримесечна блокада на испораките на хуманитарна помош во Појасот Газа, насилството се интензивираше, што доведе до остра меѓународна осуда на Израел. И покрај ублажувањето на блокадата за хуманитарна помош, светските лидери кои се состанаа во Мадрид на крајот од минатата недела повикаа на прекин на бесмислената војна. Хуманитарните организации објавија дека моменталната помош не е доволна за да се запре гладот и здравствената криза во опустошената енклава.
