Хеликоптерот на рускиот претседател бил мета на напад со 46 дронови

Хеликоптерот на рускиот претседател Владимир Путин се нашол во епицентарот на масовен напад од украински беспилотни летала за време на неговата посета на регионот Курск на 20 мај. Ова го изјави командантот на руската дивизија за противвоздушна одбрана, Јуриј Дашкин, во интервју за државната телевизија „Россија 1“.

– Хеликоптерот на претседателот се најде во центарот на нападот на непријателските беспилотни летала – изјави Дашкин, потенцирајќи дека акцијата била насочена директно кон леталото со кое се превезувал Путин.

Според него, руската армија успешно одговорила на нападот и го заштитила претседателот.

- Advertisement -

– Истовремено спроведувавме борбени операции и го штитевме летот на претседателот – додаде тој.

Во текот на инцидентот, руските сили собориле вкупно 46 украински дронови, тврди Дашкин. Нападот се случил во момент кога хеликоптерот летал над територијата на Курск, област која последниве месеци е честа цел на украински удари со беспилотни летала.

Инцидентот доаѓа во време на зголемена тензија долж руската граница, при што нападите со дронови станаа речиси секојдневие во некои делови од западна Русија.