Следи период на чести теренски контроли и казнување

Комисијата за заштита на конкуренцијата (КЗК) денеска упати повик до сите големи трговски синџири, супермаркети, добавувачи и дистрибутери да постапуваат строго согласно Законот за забрана на нефер трговски практики со цел да се обезбеди фер, транспарентен и законски пазар во интерес на економијата, производителите и потрошувачите.

Комисијата, како што соопшти, почнува со поголем број теренски контроли со цел да овозможи спроведување на законот, а ќе бидат покренувани и постапки против компании кои систематски го нарушуваат законот. Во меѓувреме ќе биде отворен дијалог со добавувачи и комори за препознавање на нефер практики.

„Ова е повик за избор: ќе бидеме пазар во кој доминираат договори зад затворени врати или систем во кој важи принципот на фер шанса за секого. Комисијата избира транспарентност, законитост и доверба. Очекуваме истото и од сите учесници во трговијата“ се наведува во соопштението.

- Advertisement -

Комисијата ги охрабрува сите економски субјекти кои се чувствуваат изложени на нефер услови или притисоци да поднесат пријава. Тие, како што наведуваат, ќе бидат третирани со сериозност, професионалност и целосна заштита на идентитетот.

– Законот е јасен – фер трговија не е опција, туку обврска. Ние не се бориме против бизнисот, туку против неправдата. Онаму каде што се наоѓа злоупотреба, Комисијата ќе постапува. Но, целта не е репресија, туку воспоставување култура на фер пазарна игра – се вели во писмената изјава на претседателката на КЗК Малинка Силјановска Николиќ.

Таа повикува на одговорност, саморегулација и конструктивна соработка, потенцирајќи дека најсилната економија е онаа во која сите играат според истите правила.

– Комисијата не е непријател на бизнисот, туку чувар на правилата. Односите меѓу трговците и добавувачите мора да бидат базирани на рамноправност, предвидливост и договор, а не на притисок, уцени и неформални условувања. Само на тој начин може да се создаде стабилен пазар на кој сите имаат еднаква шанса да успеат – додава Силјановска Николиќ.

Од КЗК  потсетуваат дека законот забранува злоупотреба на значителна пазарна моќ, вклучувајќи еднострани промени на договори, неосновани одложувања на плаќања, принудно враќање на производи, наметнати трошоци и други условувања кои ја нарушуваат рамноправната позиција на учесниците на пазарот. Посочуваат дека секој трговец кој врши притисок врз добавувач, го уценува или диктира услови надвор од законскиот и договорниот основ е предмет на прекршочна постапка и ризикува сериозни санкции.