Рускиот претседател Владимир Путин за прв пат од почетокот на војната во Украина посочи дека е подготвен за директни билатерални разговори со украинскиот претседател Володимир Зеленски, јавува Би-Би-Си. Зеленски сè уште не одговорил директно, но рече дека Украина е подготвена за разговори кои ќе обезбедат безбедност на цивилите.
Рускиот претседател Владимир Путин во понеделникот изјави за државната телевизија дека Москва ќе го разгледа предлогот на Украина за продолжување на прекинот на огнот за да се спречат воздушни напади врз цивилната инфраструктура. „Сето ова треба внимателно да се проучи, можеби дури и билатерално“, рече Путин за предлогот на украинскиот претседател Володимир Зеленски. Во саботата тој рече дека 30-часовниот велигденски прекин на огнот прогласен од Путин ќе продолжи и по Велигден и ќе трае 30 дена.
Портпаролот на Кремљ Дмитриј Песков подоцна појасни дека рускиот претседател зборувал за директни разговори со украинската страна. „Кога претседателот рече дека е можно да се разговара за ненапаѓање цивилни цели, вклучително и билатерално, тој имаше на ум преговори и разговори со украинската страна“, изјави Песков за руската новинска агенција Интерфакс, цитиран од британски Би-Би-Си.
„Затоа секогаш велевме дека сме отворени за мировни иницијативи. Се надеваме дека и претставниците на режимот во Киев ќе размислуваат слично“, додаде Путин.
Зеленски не одговори директно на неговите зборови, но во вечерното обраќање рече дека Украина е подготвена за какви било разговори што ќе ја осигураат безбедноста на цивилите. Тој исто така нагласи дека на Украина и треба јасен одговор од Москва во врска со запирање на нападите врз цивилната инфраструктура.
Немаше директни билатерални разговори меѓу двете страни од почетокот на руската агресија против Украина во февруари 2022 година.
Американскиот државен секретар Марко Рубио во петокот предупреди дека САД би можеле да се повлечат од посредувањето за ставање крај на војната во Украина доколку нема напредок. Доналд Трамп го потврди ова, но не даде временска рамка. На прашањето што ќе треба да види за да продолжат разговорите, Трамп одговори: „Ќе треба да видите подготвеност за завршување на војната од двете страни“. Претставници од САД, Европа и Украина, исто така, ќе разговараат за руската агресија во Лондон оваа недела.
