Алијанса за Албанците ги повикува надлежните државни органи во брза и ефикасна постапка да ги расчистат сите околности поврзани со приведувањето на Мухсин Арифи, директор на на ЈЗУ Специјализирана болница за геријатриска и палијативна медицина „13 Ноември Скопје“.
– Секој кој се огрешил пред законите мора да понесе одговорност, без разлика на етничката, верската или политичката припадност. Испораката на правдата мора да биде неселективна и во согласност со сите уставно-правни механизми и темелни вредности. АА останува силно посветена на борбата против корупција и темелната реформа на државниот систем со цел сите девијантни појави да бидат сведени на минимум. Албанскиот народ не заслужува да го претставуваат лица кои евентуално се обидуваат нелегално да се збогатат врз здравствените маки на граѓаните. Ова е недозволиво и надвор од принципите кои ги застапуваме. Партиските органи на АА ќе ги преземат сите неопходни статутарни чекори за зачувување на угледот на партијата – соопшти партијата Алијанса за Албанците, застапувана од Арбен Таравари.
М.А. е предложен од Алијанса за Албанците како времено решение за прв човек на Специјализираната болница.
И Министерството за здравство соопшти дека се залага за што побрзо расчистување на случајот од страна на Јавното обвинителство во врска со наводите за примање поткуп од раководно лице во јавна здравствена установа.
„Министерството за здравство стои на располагање доколку се потребни какви било информации по службена должност. Наш приоритет останува обезбедување најсоодветна грижа за сите пациенти во јавните здравствени установи“, соопшти Министерството, каде министер е токму Таравари.
Директорот на специјализираната болница за геријатрија е осомничен дека зел мито за да хоспитализира пациент.
„Во координирана акција на Основното јавно обвинителство за гонење организиран криминал и корупција и МВР приведени се 2 лица, под сомнение за кривични дела Примање поткуп и Примање награда за противзаконито влијание. Се постапува за целосно расчистување на настанот“, соопшти Јавното обвинителство.
