Поради компликации за време на бременоста или породувањето, на секои две минути во 2023 година умира по една жена, се вели во извештајот на Светската здравствена организација (СЗО).
Во извештајот објавен во понеделникот, се проценува дека 260.000 жени ширум светот загинале на ваков начин во текот на 2023 година, а во него се предупредува на опасностите кои доаѓаат со намалувањето на хуманитарната помош, пишува Belganewsagency.
Според СЗО, од 2000 година, бројот на смртни случаи поврзани со бременост е намален за 40 отсто, главно поради подобриот пристап до основните здравствени услуги. Сепак, во извештајот се предупредува дека темпото на напредок се намалува од 2016 година.
Намалувањето на хуманитарните средства имаше сериозно влијание врз здравјето во многу региони, принудувајќи ги земјите да ги намалат критичните услуги за мајките, новороденчињата и децата.
Спасувачки третмани
Кратењата резултираа со затворање на здравствени установи, губење на медицински персонал и прекини во синџирите на снабдување со клучни лекови и третмани за крварење, прееклампсија и маларија – водечки причини за смрт кај бремените жени.
Според директорот на СЗО, Тедрос Аданом Гебрејесус, покрај обезбедувањето пристап до здравствена заштита за бремените жени, од суштинско значење е и зајакнувањето на здравјето и репродуктивните права на жените и девојчињата.
„Иако извештајот нуди трошка надеж, податоците исто така покажуваат колку бременоста сè уште може да биде опасна во многу делови од светот, и покрај решенијата за спречување и лекување на компликациите кои предизвикуваат најмногу смртни случаи кај бремените жени“, рече тој.
Една од целите за одржлив развој на Обединетите нации е да се намали смртноста на бремените жени од 328 смртни случаи на 100.000 живородени во 2000 година на помалку од 70 до 2030 година.
Постигнувањето на таа цел е „предизвик без преседан“, се вели во извештајот: „Потребна е итна акција за да се обезбеди здравјето на мајките и да се стави крај на трагедијата од смртта на мајките. Жените имаат право не само да ја преживеат бременоста, туку и да живеат во добро здравје“.
