Во Ријад е во тек нова средба меѓу претставниците на Украина и САД за прекин на огнот во војната Украина-Русија

Во Ријад е во тек нова средба меѓу претставниците на Украина и САД за прекин на огнот во војната Украина-Русија, изјави денеска извор од украинската делегација.

– Ние сè уште работиме со Американците – изјави изворот пред мала група новинари.

Средбата доаѓа по вчерашните долги разговори меѓу Американците и Русите за прекинот на огнот во Украина, исто така одржани во главниот град на Саудиска Арабија.

- Advertisement -

Претходно денеска извор од Белата куќа изјави дека преговорите предводени од САД во Саудиска Арабија со делегациите од Украина и Русија напредуваат добро и наскоро се очекува позитивно соопштение.

– Разговорите кои ги овозможија техничките тимови на администрацијата на Трамп во Ријад се одвиваат исклучително добро и сите вклучени страни работеа цел ден и ноќ. Очекуваме позитивно соопштение во блиска иднина – рекол изворот, пренесуваат светските агенции.

Украинците и Американците пред два дена започнаа нови разговори во Саудиска Арабија со цел делумен прекин на огнот во украинско-руската војна, пред руско-американските преговори одржани вчера. Беше најавено и дека Украинците повторно ќе се сретнат со Американците по американските разговори со Русите.

Еден од руските преговарачи Григориј Карасин денеска изјави дека вчерашните разговори меѓу руската и американската делегација за евентуален прекин на огнот во Украина биле корисни.

– Разговаравме за сѐ, тоа беше интензивен дијалог, не беше лесен, но беше многу корисен за нас и за Американците – рече Карасин, додавајќи дека разговорите ќе продолжат.

Американската и руската делегација најавија дека денеска ќе излезат со заедничко соопштение за разговорите.