Кривичниот суд денеска попладне го соопшти своето решение со кое ја преиначил претходната одлука во врска со мерката за притвор на сопственикот на компанијата „Пуцко петрол“, Асмир Јахоски. Тој е осомничен во истрагата за набавка на нафтени деривати за потребите на државата. Имено, наместо мерката за куќен притвор која беше одредена по првото судско одлучување, сега Јахоски е упатен во 30-дневен притвор, кој ќе го извршува во затворот „Скопје“ во Шуто Оризари.
„Кривичниот совет при Основниот кривичен суд Скопје, постапувајќи по жалба на Основното јавно обвинителство за гонење организиран криминал и корупција, изјавена против решение на судија на претходна постапка, за А.Ј., поврзано со истрагата за набавка на мазут во ТЕЦ Неготино, донесе решение со кое ја преиначува одлуката за куќен притвор и му одредува мерка притвор во траење од 30 дена. Оваа одлука е основана врз опасноста од бегство, како и околности кои упатуваат на можноста тој да влијае врз сведоци и да го попречи текот на истрагата“, се вели во соопштението од Судот.
Судот исто така информираше дека донесеното решение е веќе доставено до странките во постапката и дека надлежната полициска станица го обезбедила и спровела Јахоски во истражниот затвор „Скопје“. Странките имаат право да поднесат жалба на ова решение до Апелациониот суд Скопје.
Се потсетува дека претходно, судот и Јавното обвинителство имаа јавно препукување околу тоа кој ја предложил првичната мерка за куќен притвор на Јахоски, која беше оправдана со тврдењето дека тој е старател на четири деца. Подоцна беше откриено дека Јахоски всушност не поднел барање за старателство на децата, што доведе до преиспитување на неговата мерка за притвор.
