Тенисерката Елина Свитолина не е само спортска ѕвезда, туку и храбра жена која активно се бори за својата татковина Украина во време на руската агресија. Од моментот кога започна војната во Украина, Свитолина започна да покажува цврст став и да го користи својот глас и влијание за да поддржи својот народ.
„Не се поздравувам со руските тенисерки на теренот“ – ова беше само еден од начините на кои Свитолина ја демонстрира својата солидарност со Украина. Покрај тоа, таа редовно се огласуваше во јавноста, објавувајќи информации за состојбата во нејзината земја и упатувајќи апели за помош и поддршка.
Тенисерката не се задоволи само со говорење – таа активно учествува и на терен. Свитолина неколку пати ја посети линијата на фронтот, а по време на турнирот во Индијан Велс даде интервју за германскиот Билд, каде изјави дека ако е потребно, таа со задоволство би земала оружје за да ја брани Украина. Но, исто така, истакна дека верува дека со нејзините хуманитарни напори има поголем ефект отколку што би имала на фронтот.
– Дефинитивно би војувала ѝ би ја бранела Украина, но сметам дека сега сум покорисна на оваа позиција отколку ако би била на фронтот со пушка во рака. Во изминатите три години собрав повеќе од 1,5 милиони евра помош за Украина. Мислам дека тоа е покорисно отколку да бидам на фронтот – изјави Свитолина.
Тенисерката редовно ја посетува Украина, во обид да донесе не само помош, туку и радост и надеж во животите на луѓето во нејзината земја.
– Мојето семејство е во Одеса, а линијата на фронтот не е далеку. Се трудиме да внесеме барем малку радост во нивниот живот во ова тешко време – додаде Свитолина.
Не е лесно за нејзиниот сопруг, тенисерот Гаел Монфис, кој секогаш се грижи кога неговата сопруга патува за Украина.
– Гаел е секогаш многу нервозен кога треба да одам во Украина. Се плаши, но му објаснувам дека безбедносните мерки се многу силни. Многу сум му благодарна за неговата поддршка. Не сум сигурна колку сопрузи би го разбрале ова – рече Свитолина.
Тенисерката продолжува да биде пример на храброст и решителност во овие тешки времиња за Украина.
