Владата на денешната 57-ма седница го усвои предлогот за изменување и дополнување на Законот за медиуми, со кој првпат се воведува правна рамка за интернет медиумите.
Со оглед на тоа што повеќе од 70% од јавноста се информира преку интернет, се наметна потребата онлајн медиумите да станат дел од медиумската регулатива. Со ова, се очекува поголемо поттикнување на саморегулацијата во новинарството и зголемена конкурентност во медиумскиот простор.
Предлог-законот има за цел да обезбеди јасни правила за основање и регистрација на интернет порталите, што ќе придонесе за поефикасно решавање на постојните предизвици во дигиталниот медиумски сектор.
Министерот за дигитална трансформација, Стефан Андоновски претходно рече дека нацртот-законот бил објавен на системот ЕНЕР, дека имало различни коментари и дека актуелната верзија е некаква средна вредност што произлегла од нив.
– Овој закон како идеја потекна од два аспекти. Едниот е патоказот за владеење на правото и поглавјето 23, кое утврдува дека мора да имаме поголема јасност и транспарентност во уредувањето на медиумите и препознавање заради гарантирање на конкурентност и гарантирање на квалитетот и професионализмот на медиумите, признавање и препознавање на онлајн-медиумите. Вториот аспект е дека во разговори со Здружението на онлајн-медиуми и останатите онлајн-медиуми, тие истакнаа подготвеност да предложат и иницираат ваков тип измени што ќе значат нивно препознавање како медиум, работа што ја вршат долги години, а никогаш не беше препознаен нивниот ангажман како медиум – рече министерот Андоновски.
Министерот потенцираше дека како подносители и предлагачи на измени во медиумските закони, тие не сакаат да скратат права на новинарите.
– Една забелешка околу Европскиот акт на медиумски слободи – идејата наша нема никогаш да биде да ја влошиме состојбата во медиумскиот сектор. Сме стасале до некое ниво. Не велам дека некој е задоволен, или не е задоволен од тоа, но сме на определено ниво. Не е најдоброто, не е најлошото. Ниту еден чекор на оваа влада нема да биде во насока да се влошат состојбите. Ако можеме да помогнеме со нов закон за медиуми, со нов закон за аудио и аудиовизуелни медиумски услуги, за состојбата да биде подобра, тогаш ќе се впуштиме во таа трка. Но, никако нема да влеземе во ситуација по секоја цена да го менуваме законот, или по секоја цена да носиме нов закон за медиуми со којшто ќе ја влошиме состојбата – рече Андоновски.
Тој смета дека ќе биде потребна инклузивна дебата во којашто ќе учествуваат националните телевизии и ќе се земат предвид ставовите на здруженијата на новинари, на онлајн- медиумите, печатените медиуми, Агенцијата за аудио и аудиовизуелни медиумски, како и на јавниот сервис за да се види кој е ставот, но доколку ставовите се разликуваат многу, Владата нема да влезе во процес на менување на законите.
