Што зборувале двајцата лидери?

Премиерот на Велика Британија, Кир Стармер, разговарал со претседателот на САД, Доналд Трамп, но не е познато дали разговарале за прекин на американската помош за Украина, соопшти денеска портпаролот на Стармер.

Британските медиуми пренесуваат дека двајцата лидери телефонскиот разговор го реализирале синоќа, а портпаролот изјави дека двете земји имаат иста цел, односно безбеден и траен мир во Украина.

Претходно денеска, откако Трамп ја суспендираше воената помош за Киев, Стармер рече дека Обединетото Кралство останува посветено на обезбедувањето траен мир.

- Advertisement -

„Остануваме апсолутно посветени на обезбедување траен мир во Украина и работиме со клучните сојузници за да ги поддржиме овие напори. Тоа е правилна работа и во наш интерес е да го сториме тоа“, се наведува во соопштението на портпаролот на британската Влада.

Трамп нареди да се прекине воената помош за Украина по вербалната расправија меѓу него и претседателот на Украина, Володимир Зеленски, во петокот во Овалната соба. Извори наведуваат дека помошта ќе остане суспендирана сѐ додека „Трамп не биде сигурен дека Зеленски е подготвен да започне мировни преговори“.