Германија е лидер во снабдувањето на Украина со противвоздушни системи

Украинскиот претседател Володимир Зеленски денеска разговараше со лидерот на германската Христијанско-демократска унија (ЦДУ) и кандидат за германски канцелар Фридрих Мерц и договори понатамошна соработка.

„Добар разговор со лидерот на партијата ЦДУ, која победи на изборите за Бундестагот, Фридрих Мерц. Координирани позиции. Ви благодарам за поддршката. Ние во Украина многу ги цениме напорите на Германија да ја врати европската безбедност и да го заштити животот во Украина“, напиша Зеленски на Икс.

Тој додаде дека Германија е лидер во снабдувањето на Украина со системи за противвоздушна одбрана и игра една од водечките улоги во обезбедувањето на финансиската стабилност на земјата.

- Advertisement -

Мерц претходно го опиша состанокот меѓу американскиот претседател Доналд Трамп и Зеленски во Белата куќа како „намерна ескалација“.

– Toa не беше спонтана реакција на интервенциите на Зеленски, туку очигледно намерна ескалација на состанокот во Овалната соба – рече Мерц, додавајќи дека Европа е под притисок брзо да реагира.

Мерц истакна дека од клучно значење е да се одржи соработката меѓу ЕУ и САД и дека се уште не планира патување во САД, туку дека тоа ќе се случи по формирањето влада во Берлин.