Коалицијата Вреди бара итно разрешување на главниот обвинител

Коалицијата Вреди најави иницијатива за разрешување на главниот обвинител Љубчо Коцевски, обвинувајќи го за злоупотреба на службената должност, лошо раководење и загрозување на доверливоста на истрагите. Според коалицијата, неговото постапување довело до сериозен пад на довербата во правосудниот систем.

„Коцевски не само што не ја одржуваше доверливоста на постапките, туку и со своите одлуки директно им помогна на криминалците да ја избегнат заслужената казна. Тој го наруши угледот на институцијата, а со тоа и правната сигурност во земјата“, се наведува во соопштението на коалицијата.

Од Вреди потсетуваат дека за време на мандатот на Коцевски, јавноста беше сведок на неколку случаи во кои информации од Обвинителството протекоа во јавноста, што, според нив, никогаш не смеело да се случи.

- Advertisement -

„Ова не се изолирани случаи, туку сериозна практика која дополнително ја намали довербата во судскиот систем. Коцевски и Ислам Абази беа одговорни за ослободување на обвинетите за настаните од 27 април, а тоа беше само една од низата одлуки што отворија сомнеж за селективна правда“, додаваат од коалицијата.

Во нивното соопштение се истакнува дека иницијативата за разрешување на Коцевски се темели на три клучни фактори:

– Барањата на меѓународните партнери за зголемена транспарентност и законитост;

– Кризата на доверба во правосудниот систем, која, како што тврдат, достигнала алармантно ниво;

– Повторените законски прекршувања што дополнително го компромитираат обвинителството.

„Републичкиот обвинител го загуби својот легитимитет и кредибилитет – мора веднаш да си замине! Ќе ја поднесеме иницијативата до Обвинителскиот совет и Собранието, бидејќи владеењето на правото е клучен столб на демократијата“, порачуваат од Вреди.

Од коалицијата истакнуваат дека остануваат посветени на темелни реформи во судството и се залагаат за транспарентен процес при изборот на нов главен обвинител, заснован на јасни професионални критериуми.