Таравари вели дека балканското буре барут може да го запали целиот свет

Еден од лидерите на коалицијата Вреди и актуелен министер за здравство, Арбен Таравари, во објава на социјалните мрежи ги анализира настаните што се случуваат во светската политика по доаѓањето на власт на администрацијата на американскиот претседател Доналд Трамп и состојбите на Балканот, особено на Косово.

Таравари пишува дека дипломатијата полека исчезнува и дека претседателот Трамп целосно ги менува ставовите и постапките на САД.

„Целиот свет е сцена, а сите мажи и жени само актери… Исто како и ненадеен крај на бракот, се доживува распад на американско-европските односи, затоа што има дефект и тоа е неспорно! Сега, дипломатијата што исчезнува останува слаба надеж дека овој раскол нема да се претвори во раскинување. Се појавија секакви теории, шпекулации и претпоставки, но суштинското прашање останува: Што ќе се случи со светот?! Претседателот Трамп целосно ги менува ставовите и постапките на САД. Овие промени се еквивалентни на движењето на тектонските плочи, а бидејќи САД се една голема плоча, земјотресот ги стресува сите. Некои европски лидери ја доживуваат оваа динамика на начин што наликува на повик за помош од психолог“, пишува Таравари, пренесува порталот Телеграфи.

- Advertisement -

Таравари пишува дека Балканот е буре барут и дека ако се земе парче земја од Косово тоа може да биде причина за почеток на голема војна.

„Балканот секогаш има буре барут кое колку и да има предрасуди или судење од официјална Европа, доколку се запали, со себе ќе го понесе не само овој континент, туку и целиот свет. Овие нови спорови кои целосно ги нарушуваат старите баланси, до каде ќе одат, а како ќе се одразат особено на Косово?! Сите актери кои учествуваат на овој настан треба да знаат дека: ако се донесе неправедна одлука, дури и за дел од неа, Косово ќе остане запишано во историјата како малата земја што го предизвика големиот конфликт и сите ние ќе бидеме дел од конфликтот кој би можел да се нарече и Трета светска војна“, додава Таравари.