Владата го усвои предлогот за разрешување на државниот обвинител

Владата на денешната седница го усвои предлогот за разрешување на јавниот обвинител Љупчо Коцевски.

Во предлогот за разрешување до Собранието, Владата наведува три причини.

Прво, Коцевски направил крупни професионални грешки при раководењето со Јавното обвинителство, што доведе до нарушување на ефиканоста и на функционалноста на институцијата.

- Advertisement -

Второ, Коцевски неовластено изнесувал информации и податоци за судски предмети, со што ја повредил обврската за заштита на тајноста на постапката, утврдена со закон.

Како трето, Коцевски го нарушува угледот на ЈО и неговиот личен углед во целина, не постапувајќи согласно обврските предвидени во Уставот, законите и меѓународните договори ратификувани во согласност со Уставот.

По завршувањето на владините процедури предлогот ќе биде испратен до Советот за јавни обвинители, кој има рок од 15 дена да даде позитивно или негативно мислење до Владата.

Владата на 11 февруари 2025 година донесе одлука да поведе постапка за разрешување на државниот јавен обвинител Коцевски, кој беше избран на оваа позиција пред една година. Мандатот на државниот обвинител трае 6 години.

Министерството за правда, постапувајќи по заклучокот на Владата, го изготви предлог-мислењето за разрешување на државниот јавен обвинител.

„Во изминатиот период бевме сведоци на низа скандали, нарушена функционалност на Јавното обвинителство, нарушени меѓучовечки односи, незаконски постапувања и корупција, неефикасност во кривичното гонење и повреда на принципите на организација на Јавното обвинителство и самостојноста во вршењето на функциите на обвинителите во Вишото јавно обвинителство“, соопшти тогаш Министерството за правда.

Државниот јавен обвинител, како што велат од Министерството за правда, постапувал во предмети во кои согласно законските одредби постоеле околности кои предизвикуваат сомневање во неговата непристрасност, како и судир на интереси, а за кои околности тој требало да знае и требало да се изземе.

Републичкиот обвинител Коцевски го демантираше тврдењето дека постапил незаконски. Тој изјави дека ќе се произнесе по предлогот за негово разрешување откако Владата ќе го достави до Советот на јавни обвинители. Во врска со барањето на премиерот Христијан Мицкоски да поднесе оставка, Коцевски рече дека ќе одговори откако ќе ги види основите за разрешување. Најави дека ќе се повлече од функцијата доколку се утврди дека навистина сторил тешка дисциплинска повреда.

Премиерот Мицкоски рече дека постапката за разрешување може да трае неколку недели или месеци.

– Не можеме ние како Влада да го разрешиме, туку можеме да ја отпочнеме постапката. Треба да се испрати дописот до Советот на јавни обвинители, па во рок од 15 дена да чекаме мислење. Оваа процедура ќе потрае, нема да заврши брзо. Таков е законот – рече Мицкоски.