Макрон ќе го разубедува Трамп во ставовите на средба следната недела

Францускиот претседател Емануел Макрон ќе му каже на својот американски колега Доналд Трамп дека „не може да биде слаб“ пред Владимир Путин и дека неговиот „стратешки интерес е ист како и европскиот“.

– Ќе му кажам: Не можете да бидете слаб пред претседателот Путин. Тоа не сте вие, тоа не е ваш заштитен знак, тоа не е во ваш интерес. Како тогаш можете да бидете кредибилни пред Кина, ако сте слаби пред Путин? – изјави Макрон одговарајќи на прашања во живо на Икс.

Францускиот претседател, кој следната недела ќе престојува во Вашингтон, изјави дека неговиот украински колега Володимир Зеленски е „избран според слободен систем“, што не е случај со Путин. Макрон алудираше на изјавата на Трамп дека Зеленски е диктатор кој не е избран на избори.

- Advertisement -

– Тој (Зеленски) е избран претседател според слободен систем. Тоа не е случај со Владимир Путин, кој ги убива своите противници и долго време манипулира со своите избори – рече Макрон, додавајќи дека претседателските избори во Украина се одложени поради војната.

Францускиот претседател додаде дека нема намера „утре“ да испраќа војници во Украина, туку само кога ќе се склучи мир.

– Не решив утре да испратам сили во Украина, не. Она што го разгледуваме е испраќање сили за гарантирање на мирот кога ќе дојде преку преговори – рече Макрон.