Во Министерството за економија денеска се одржа средбата со претставници на претставници на големите трговски синџири и на дистрибутерите.
Тема на разговор на средбата била предлог одлуката на Министерството за економија за ограничување на бруто профитната маржа на 10% во трговија на големо и 10% во трговија на мало на дел од основните прехранбени производи и средства за хигиена.
Од Министерството информираа дека трговците и дистрибутерите дале свои предлози и забелешки кои Министерството дополнително ќе ги анализира.
Договорено е конечна одлука за тоа дали ќе има ограничување на маржите и колкави ќе бидат да се донесе следната недела.
Денешната средба доаѓа откако претставници на Стопанската комора на трговци на големо и мало се сретнаа со премиерот Христијан Мицкоски на која побараа да ги соопштат своите ставови и предлози во врска со зголемените цени.
Владата во вторникот на седница го задолжи Министерството за економија да ја подготви Предлог-одлуката којашто, според најавите, требаше да се одржи вчера на итна седница, но тоа не се случи. Со предлог-одлуката требаше да бидат опфатени основните прехранбени производи на истите 73 групи на производи кои беа во претходните кошници, но и детергентите, бебешката храна и други непрехранбени производи кај кои е забележана многу висока маржа, а се дел од основните потреби на граѓаните.
Одлуката беше донесена по разгледувањето на извештајот на Државниот пазарен инспекторат, според кој кај трговците на мало беше утврдено дека има над 20% маржа на основните прехранбени производи и над 30% маржа кај средствата за лична хигиена, додека кај увозниците и дистрибутерите се евидентирани повисоки маржи кои одат дури и до 50%.
