Путин не смее повторно да нападне

Лидерите никогаш не ѝ ветиле на Украина членство во НАТО доколку постигне мировен договор со Русија, изјави за новинарите денеска генералниот секретар на НАТО, Марк Руте.

– Мораме да се погрижиме (рускиот претседател) Владимир Путин никогаш повеќе да не се обиде да ја нападне Украина, тоа е клучно, но на Украина никогаш не ѝ беше ветено дека ќе стане дел од НАТО како дел од мировниот договор – рече Руте.

Европските лидери претходно денеска го предупредија Вашингтон против украинскиот мировен договор со Русија зад нивниот грб додека се обидуваат да обезбедат место на преговарачката маса, откако американскиот претседател Доналд Трамп разговараше со Путин и најави почеток на преговорите.

- Advertisement -

Потегот на Трамп ги вознемири европските земји кои сакаат да играат централна улога во мировните преговори бидејќи секој договор за Украина, која Русија ја нападна пред три години, ќе има последици по нивната безбедност.

Американскиот секретар за одбрана Пит Хегсет вчера изјави дека е нереално Украина да се врати на своите граници од пред 2014 година и дека членството на Украина во НАТО нема да биде дел од мировниот договор.

Во 2014 година, Русија го окупираше и анектираше украинскиот полуостров Крим.

Европските лидери тврдат дека една од причините зошто треба да бидат вклучени во преговорите е тоа што Вашингтон јасно стави до знаење дека очекува од нив да дадат безбедносни гаранции за секој мировен договор, што може да значи распоредување на европски трупи во Украина.