Зеленски објасни како Вашингтон профитирал од конфликтот

Претседателот на Украина, Володимир Зеленски, во интервјуто објавено на Јутјуб каналот на „Пирс Морган нецензурирано“ (Piers Morgan Uncensored) изјави дека САД заработиле милијарди долари од војната во Украина, благодарение на големите договори за вооружување.

Тој додаде дека американските компании оствариле големи приходи, дури и преку лиценцирање, поради големата побарувачка на оружје и опрема.

– Американските компании заработија милиони дури и на лиценците бидејќи немаат канцеларии во Европа. Значи тоа се приходи во милијарди – наведе Зеленски.

- Advertisement -

Тој, исто така, изрази подготвеност за директни преговори со рускиот претседател, Владимир Путин, и со другите сили за завршување на тригодишната војна.

Зеленски, на прашање на британскиот водител Пирс Морган за можноста за преговори со Путин, одговори дека тоа би го направил „ако тоа би било единствената опција која може да им донесе мир на граѓаните на Украина“.

– Тогаш ќе прифатиме состанок на 4 учесници – наведе Зеленски, без да прецизира кои би биле другите учесници, но Морган ја спомна можноста за преговори помеѓу Украина, Русија, САД и Европската Унија.

Путин кон крајот на јануари изјави дека е отворен за преговори за крај на војната во Украина, но отфрли директни разговори со Зеленски бидејќи не гледа „волја“ кај Киев.