Поранешниот и нов американски претседател, Доналд Трамп, предизвика нова полемика со изјавата дека не е 100% сигурен дека не смее да се кандидира за трет мандат.
– Собрав многу пари за следните избори, претпоставувам дека не можам да ги искористам за себе, но не сум 100% сигурен – рече Трамп на вечерата со републиканските членови на Претставничкиот дом на Флорида.
Ова не е првпат Трамп да навести можност за трет мандат. На неодамнешниот митинг во Лас Вегас, Невада, тој изјави дека „би му била најголема чест во животот да служи не еднаш, туку двапати или трипати“, дополнително подгревајќи ги шпекулациите за неговите идни политички планови.
Републиканскиот претставник Енди Оглс од Тенеси претходно предложи измена на Уставот на САД за да му се овозможи на Трамп трет мандат. Меѓутоа, измената на американскиот Устав е исклучително сложен процес. За формален предлог би било потребно двотретинско мнозинство во двата дома на Конгресот – што републиканците во моментов го немаат – или свикување уставна конвенција, што не се случило од 18 век. За ратификација е потребно одобрение од три четвртини од сојузните држави или 38 држави.
Во САД претседателот може да се кандидира најмногу двапати. Ова е пропишано со 22-от амандман на Уставот на САД, кој беше усвоен во 1951 година. Според тој амандман, ниту едно лице не може да ја извршува функцијата претседател повеќе од двапати, односно вкупно 8 години.
