Русија вчера соопшти дека нејзините војници зазеле стратешки важен град во источна Украина како дел од кампањата за слабеење на контролата на Киев врз индустрискиот центар на Украина.
Руското Министерство за одбрана објави пад на Велика Новосилка, која пред војната имаше околу 5.000 жители.
Украина потоа соопшти дека нејзините војници стратешки се повлекле од одредени области на градот. Доколку се потврди дека Велика Новосилка навистина е заземена, тоа ќе биде првиот значаен град што капитулирал под нападот на Москва во регионот Доњецк оваа година.
„Украинските сили се повлекоа од одредени делови на Велика Новосилка за да избегнат опкружување“, соопшти 110-та посебна механизирана бригада на својот официјален канал на Телеграм. Бригадата дејствува на тој дел од фронтот.
Аналитичарите долго време предвидуваа дека е само прашање на време кога руските сили ќе го заземат градот, кој се наоѓа на само 15 километри од областа Дњепропетровск. 110-та посебна механизирана бригада предупреди дека има близок паритет со руските сили во однос на артилерија и беспилотни летала, но дека Русите имаат голема предност во број на луѓе.
„Нашите единици, искористувајќи ги временските услови, вешто се повлекоа од областа каде што се закануваше опкружување. Тоа не значи дека целосно сме го напуштиле градот, борбите во Велика Новосилка продолжуваат. Сите акции се насочени кон минимизирање на сопствените загуби и кон предизвикување максимална штета на непријателот“, се додава во соопштението.
Бригадата објасни дека повлекувањето топографски ќе им го отежне напредувањето на Русите бидејќи реката ќе стане пречка за понатамошно напредување.
Минатата година Русија по долги и исцрпувачки битки ги зазеде Авдиевка и Вуледар, градови во регионот на Доњецк. Руските сили со месеци се обидуваат да заземат уште две важни упоришта во регионот на Доњецк, Покровск и Часив Јар.
Украина нападна 5 руски региони со дронови
Исто така, во текот на ноќта, украинските сили извршиле напад со дронови врз руски региони.
„Руските системи за противвоздушна одбрана во текот на ноќта уништиле 32 украински дронови“, соопшти денеска руското Министерство за одбрана.
Притоа, во соопштението се наведува дека украинските офанзивни беспилотни летала биле уништени при напади на 5 руски региони.
„Во текот на изминатата ноќ, дежурните системи за противвоздушна одбрана уништија и пресретнаа 32 украински беспилотни летала: 15 над територијата на регионот Воронеж, 11 над регионот Белгород, 4 над регионот Курск и по едно над териториите на Орловската и на Тверската област„, се вели во соопштението на Министерството.
Министерството потврди и дека руски ловец-бомбардер Су-34 извршил успешен напад на т.н. паметни бомби на упориште на украинските вооружени сили во пограничниот регион на Курск.
Русите ја нападнаа Украина со камикаѕе-дронови
Во меѓувреме, украинските медиуми објавија дека синоќа во повеќето украински региони е прогласена тревога поради воздушни напади на руски камикаѕе-дронови.
Според командата на воздухопловните сили на вооружените сили на Украина, од 00:08 часот, руски дронови Шахед биле откриени во источниот и во централниот дел на регионот Полтава, на север од областа Кировоград, на југоисточниот и југозападниот дел на Винитската област, на југоисточниот дел од областа Хмелницки, како и на југот и југоисточниот дел на Днепропетровска област.
Покрај тоа, украинската војска го потврди присуството на руски беспилотни летала на границата на регионите Днепропетровск, Полтава, Миколаев, Кировоград и Дњепропетровск и Запорожје.
