Доналд Трамп синоќа пристигна во Вашингтон на неговата втора инаугурација како 47. претседател на САД. Неговиот прв мандат беше од 2017 до 2021 година.
Во Вашингтон долетаа и сопругата на Трамп, Меланија и синот Барон, како и ќерката Иванка, нејзиниот сопруг Џаред Кушнер, синот Ерик и неговата сопруга Лара, сите долетаа во Вашингтон, по што Трамп со нив се упати во неговиот голф-клуб во Стерлинг, Вирџинија.
Пред инаугурацијата ќе се одржува неколку свечени настани.
Каролин Левит, претставник на транзицискиот тим на Доналд Трамп и Џеј Ди Венс, на социјалната мрежа Х напиша: „Претседателот и првата дама заминаа од Мар-а-Лаго и пристигнааа во Вашингтон, округ Колумбија. Ова е големо патување за успех на нашата земја!“.
Над луксузниот Национален голф-клуб на Трамп во Стерлинг покрај реката Потомак, на околу 50 километри од Вашингтон, синоќа се спушти магла, но тоа не спречи свечената забава да започне со огномет. На настанот, затворен за јавноста, дојдоа околу 500 гости меѓу кои и технолошки гиганти, пријатели на Трамп од деловниот свет и медиумски ѕвезди.
Настапија Лео Дејс, имитатор на Елвис Пресли и тенорот Кристофер Макио, кој претходно учествуваше на кампањски настани. Имитаторот на Елвис испеа серенада посветена на новиот претседател и првата дама на САД. На социјалните мрежи беше објавено видео од настанот.
Денеска, еден ден пред инаугурацијата, 78-годишниот Трамп ќе одржи митинг со своите поддржувачи во арената Capital one, во центарот на Вашингтон. Утре, точно напладне по источноамериканско време, Трамп треба да ја положи заклетвата.
За утре се очекува заладување што ги смени плановите за инаугурацијата на Трамп. Церемонијата ќе се одржи во внатрешна просторија на ротондата на Капитол. Парадата планирана да оди по авенијата Пенсилванија, исто така, ќе биде преместена во арената.
– Мислам дека донесовме правилна одлука. Сега ќе ни биде многу поудобно – изјави Трамп во телефонско интервју за „Ен-Би-Си њуз“.
Ѕвезди на кантри-музиката како Кери Андервуд, Били Реј Сајрус и Џејсон Алдин, диско-групата Виллаге Пеопле, раперот Нели и музичарот Кид Рок се очекува да настапат на церемонијата и настаните околу инаугурацијата.
Треба да се појават и актерот Џон Војт и борачот Хулк Хоган, како и раководители на компаниите кои го поддржуваат Трамп – извршниот директор на Тесла и Икс, Илон Маск, основачот на Амазон, Џеф Безос, извршниот директор на Мета, Марк Цукерберг и извршниот директор на ТикТок, Шоу Џи Чу.
