Русија и Иран во Москва ќе потпишат пакт за стратешко партнерство неколку дена пред инаугурацијата на Доналд Трамп за претседател на САД. Договорот кој веќе ги вклучи алармите во Вашингтон ќе ги продлабочи односите што се развија откако Русија ја започна инвазијата на Украина, пренесува Н1.
– Овој договор, како оној со Северна Кореја, не е насочен против никого – изјави рускиот министер за надворешни работи Сергеј Лавров.
Според Кремљ, времето на потпишување на договорот е чисто случајно и нема никаква врска со инаугурацијата на Трамп.
– Нека се забавуваат теоретичарите на заговор – изјави Дмитриј Песков, портпарол на рускиот претседател Владимир Путин.
Треба ли Западот да биде загрижен? Договорот на Москва со Иран се очекува да вклучува клаузула за меѓусебна одбрана, слично како договорот со Северна Кореја.
– Главниот организационен принцип на руската надворешна политика сега е водењето на војната во Украина. Секоја земја се оценува низ призмата на тоа што може да придонесе во воените напори. Како таа земја може да ѝ помогне на Русија да го издржи економскиот притисок? И како може тој однос да се инструментализира од страна на тврдокорните во Кремљ за да се казни Западот? Иран совршено се вклопува во таа категорија – изјави за Скај Њуз Александар Габуев, директор на Евроазискиот центар Карнеги Русија.
Велика Британија и САД веќе го обвинија Техеран дека ѝ обезбедува на Москва балистички ракети и беспилотни летала за употреба против Украина. Во исто време, Русија и Иран ги негираат овие тврдења. Но, одбраната е област каде двете земји сега ќе соработуваат уште поблиску благодарение на ова ново партнерство, кое Габуев го опишува како „симболичен шлаг на тортата“.
Во меѓувреме, Путин изгуби стар сојузник. Ерменија полека, но сигурно се врти кон Западот. Земјата потпиша договор со САД за проширување на безбедносната соработка. Аналитичарите посочуваат дека ова е значаен чекор во билатералните односи на двете земји.
Исто така, Вашингтон ќе започне преговори со Ереван за цивилна нуклеарна соработка, а Ерменија формално ќе се приклучи на долгогодишната коалиција предводена од САД за да ја победи екстремистичката исламистичка милитантна група ИСИС.
Путин и ерменскиот премиер Никол Пашинјан денеска телефонски разговараа за чекорите на Ереван кон Европската унија.
