Израелските власти во четвртокот наутро го обвинија Хамас дека се откажал од некои делови од договорот за прекин на огнот, по што висок функционер на Хамас, Изат ал Рашик, изјави дека групата е посветена на договорот што посредниците го објавија во средата.
Кабинетот на израелскиот премиер тврди дека Хамас се повлече од некои делови од договорот и дека создава „криза во последен момент“ во финализирањето на договорот за ослободување на заложниците и прекин на огнот во Газа.
„Хамас игнорира некои точки од договорот постигнат со посредниците и Израел во обид да изнуди отстапки во последен момент“, се вели во соопштението од кабинетот на израелскиот премиер Бенјамин Нетанјаху, пренесе АФП.
Беше наведено и дека израелската влада нема да се состане за да го ратификува договорот додека посредниците не го известат Израел дека Хамас ги прифатил сите елементи од договорот.
Американскиот претседател Џо Бајден во средата официјално објави дека Израел и Хамас постигнале договор за прекин на огнот и ослободување на заложниците што ќе стави крај на борбите во Газа и ќе ја зголеми хуманитарната помош за палестинските цивили.
Катарскиот премиер Шеик Мохамед бин Абдул Рахман Ал Тани рече дека договорот ќе стапи на сила во недела откако ќе биде одобрен од израелската влада.
Хамас ги негира обвинувањата
Палестинската група на отпорот Хамас во четвртокот ги негираше тврдењата на израелскиот премиер Бенјамин Нетанјаху дека се откажува од договорот за прекин на огнот објавен од посредниците, нагласувајќи ја својата посветеност на договорот, јавува Anadolu.
„Хамас е посветен на договорот за прекин на огнот објавен од посредниците“, рече водачот на групата, Изат ал Ришк.
Израелскиот безбедносен кабинет требаше да се состане во четврток за да го ратификува договорот.
Катарскиот премиер и министер за надворешни работи Мохамед бин Абдулрахман доцна во средата објави дека е постигнат договор за прекин на огнот во Појасот Газа, велејќи дека неговото спроведување ќе започне во недела.
