Зошто Дрина е обоена во црвена боја – агенцијата денеска испитува примероци од вода

Агенцијата за заштита на животната средина денеска треба да ги испита примероците од водата од Дрина, по несреќата поради која сливот на реката долж територијата на Република Српска и Србија се обоени во црвено, соопшти Министерството за заштита на животната средина на Србија.

Јавниот здравствен институт Шабац има закажано испитување на мостра вода, се наведува во соопштението.

И лабораторијата на ЈКП „Водовод и канализација“ во Лозница го испитува квалитетот на водата за пиење со мерење на основни параметри на секој час, а бунарите најблиску до реката превентивно се исклучуваат.

- Advertisement -

Републичките инспектори за заштита на животната средина вчера излегоа на терен за кај надлежните служби на лице место да ја утврдат причината поради која Дрина е обоена во црвено.

Според информациите од надлежните, несреќата се случила во Република Српска кога поради обилните врнежи дошло до одрон на отпад од ѓубриштето на фабриката „Алумина“ во Зворник.

Инспекторите вчера ја посетија локацијата Сунчана Река, низводно од Мали Зворник, при што утврдија дека се преземаат сите неопходни мерки и дека за несреќата се информирани сите надлежни институции на Република Српска, како и на Србија. – Водоводната инспекција на Републичката дирекција за води, Агенцијата за заштита на животната средина и одговорното ЈВП „Србија вода“, соопштија од министерството.