234 лица уапсени во Турција во меѓународна акција против организираниот криминал

Турските власти денеска соопштија дека уапсиле 234 осомничени во пет земји во голема меѓународна операција против организации вклучени во трговија со дрога.

„Уапсени се 234 високи членови на организирани криминални групи, 225 во земјата и девет во странство“, изјави турскиот министер за внатрешни работи Али Јерликаја, додавајќи дека апсењата се извршени во Холандија, Германија, Шпанија и Белгија.

Меѓу уапсените има и членови на организации вклучени во шверц на кокаин, хероин и екстази на неколку континенти, рече Јерликаја.

- Advertisement -

Запленети се повеќе од 21 тон наркотици, имот и стока во вредност од 13 милијарди турски лири (околу 300 милиони евра), додаде Јерликаја.

„Се соочуваме со голема меѓународна структура“, рече турскиот министер, истакнувајќи дека осомничените се обвинети за широк спектар на кривични дела, од трговија со дрога до убиства и перење пари.

„Како дел од таа операција беа разменети информации и документи со полициски сили од Франција, Англија, Австралија, САД, Грција, Србија, Азербејџан, Косово, Бугарија, Северна Македонија, Бразил и Иран“, рече Јерликаја.