ЗИДАН НЕ Е РАЗОЧАРАН, НО ПРИЗНА НЕУСПЕХ

Францускиот селектор Зинедин Зидан изјави дека не е разочаран од неговите фудбалери на мечот со Итаија, иако Франција загуби со 3:1. Сепак, тој призна дека неговата репрезентација почнала да се распаѓа во второто полувреме, особено по вториот примен гол.

– Најважно е да создаваме шанси. Секако, кога ги имаме, треба да ги искористиме. Но, од тој аспект не сум разочаран – изјави Зидан по натпреварот, пренесува францускиот „Фудбал.фр“.

И покрај неуспехот, тој најави дека нема да отстапи од своите фудбалски принципи.

- Advertisement -

Франција одлично го започна натпреварот на „Сан Сиро“ и поведе во 10. минута со голот на Мајкл Олисе, кој ја искористи грешката на италијанскиот голман Џанлуиџи Донарума.

Италијанците израмнија во 26. минута, а Рајан Шерки потоа ја погоди стативата при резултат 1:1.

Во второто полувреме домаќините целосно го презедоа натпреварот, постигнувајќи голови во 63. и во 75. минута.

Зидан призна дека неговите фудбалери ја загубиле контролата врз играта.

– Губевме дуели и бевме послаби без топката. Во второто полувреме почнавме да се распаѓаме. Кога го примивме вториот гол, отстапивме од начинот на кој сакаме да играме – објасни францускиот селектор.

Ова беше првиот пораз на Франција откако Зидан ја презеде селекторската функција.

Следниот предизвик за Франција е неделниот натпревар против Турција во Бордо, кој ќе одлучува за пласманот во четвртфиналето на Лигата на нации.

Зидан се надева дека за тој дуел ќе може да смета на капитенот Килијан Мбапе, кој го пропушти гостувањето во Милано.