Законот постои, а казиното доаѓа? Жителите на Мацари бараат стоп за казино покрај училишта, парк и здравствен дом

Жителите на Мацари до Министерството за финансии поднесоа петиција со барање за проверка и спречување на отворање казино (автомат клуб) во близина на училишта, парк и здравствен дом. Прашањето што го поставуваат е едноставно: ако државата изгласа закон за игрите на среќа, зошто граѓаните мора со петиции да бараат тој да се почитува?

Државата во последниве години најави построги правила за игрите на среќа. Јавноста слушна дека казината и обложувалниците ќе мора да се држат подалеку од училиштата. Во Мацари сега се тестира дали тоа важи и во пракса.

Жителите бараат од Министерството за финансии да провери и да спречи отворање казино во близина на училишта, парк и здравствен дом. Тие не се против закон, туку го бараат неговото спроведување.

- Advertisement -

Прашањата што му ги упатуваме на Министерството се:

• Дали е издадена или е поднесено барање за дозвола за приредување игри на среќа на таа локација?
• Колкаво е растојанието од најблиските училишта, паркот и здравствениот дом, и кој го мерел?
• Дали законот забранува казино во близина на здравствени установи и паркови, или само на училишта?
• Кои инспекции ја проверувале локацијата и кога?
• Што се случува со објектите што веќе работат во забранетите зони?

Дотогаш останува прашањето што го поставуваат и самите граѓани: дали законот е вистинска заштита, или уште едно ветување што важи само додека не се појави инвеститор? Одговор на Министерството ќе објавиме веднаш штом го добиеме.

Редакција Охрид Скај