Загреб дополнително го отежна европскиот пат на Подгорица

Хрватскиот премиер Андреј Пленковиќ интервенирал во Брисел, по што од нацрт-заклучоците на Европскиот совет биле отстранети роковите поврзани со напредувањето на Црна Гора кон членство во Европската Унија.

Според хрватските медиуми, Пленковиќ ги запознал европските лидери со осумте барања кои неодамна ги постави Загреб. Исполнувањето на барањата Хрватска го поставува како услов за поддршка на завршувањето на пристапните преговори за Црна Гора.

Конкретната промена се однесува на две формулации што претходно биле дел од нацрт-документот.

- Advertisement -

Избришано е повикувањето на привремено затворање на сите преговарачки поглавја до крајот на 2026 година, како и формулацијата за што поскоро финализирање на договорот за пристапување.

Во првичниот нацрт, Европскиот совет ја поздравувал работата на подготовката на договорот за членство на Црна Гора и ја земал предвид намерата на претседателството со Советот да постигне договор за затворање на поглавјата до крајот на годината, под услов Подгорица да ги спроведе потребните реформи.

По интервенцијата на хрватскиот премиер, овие временски одредници биле отстранети, објави хрватскиот портал „Индекс“.

Загреб има добра намера, но…

Пленковиќ на состанокот истакнал дека Хрватска има конструктивен и добронамерен пристап кон европската интеграција на Црна Гора, но дека очекува решавање на билатералните прашања што со години остануваат отворени.

Тој нагласил дека поддршката на Загреб за членството на Црна Гора е поврзана со исполнувањето на тие обврски.

Хрватска претходно оваа недела испратила документ до земјите членки на ЕУ, како и до кабинетите на претседателите на Европската комисија и на Европскиот совет, во кој детално ги образложила своите позиции.

Во документот се наведени 8 барања, од кои шест се поврзани со Поглавјето 23, кое ги опфаќа правосудството и основните права, а две со Поглавјето 31, кое се однесува на надворешната, безбедносната и одбранбената политика.

8 услови што Загреб ги стави на маса

Станува збор за 8 прашања што Хрватска ги смета за нерешени и за кои очекува конкретни чекори од црногорските власти.

Шест од барањата се поврзани со правосудството и основните права, додека преостанатите две се однесуваат на надворешната и безбедносната политика. Со нивното вклучување во дипломатската комуникација со членките на ЕУ, Загреб настојува билатералните прашања да добијат тежина и во пристапниот процес.

Меѓу отворените прашања што Хрватска ги поставува пред Црна Гора се правата и положбата на хрватското малцинство, решавањето на прашањето за сопственоста на школскиот брод „Јадран“, обесштетувањето на поранешните затвореници од логорот Морињ и утврдувањето на одговорноста за воените злосторства.

Загреб бара и решавање на граничните прашања, вклучително и спорот околу Превлака.

Хрватска, како полноправна членка на Унијата, има можност да влијае врз одлуките за напредувањето на земјите кандидати.

Отстранувањето на временските одредници од нацрт-заклучоците не значи формално запирање на преговорите со Црна Гора, но ја прави помалку извесна политичката поддршка за нивно завршување во претходно предвидениот рок.