Нафтената рафинерија во рускиот град Орск, која беше погодена од украинско беспилотно летало пред два дена, беше принудена целосно да се затвори, а поправките би можеле да потраат и до шест месеци, изјави во четвртокот регионалниот гувернер, предупредувајќи на прекини во снабдувањето со гориво.
„Шрапнелите ја оштетија клучната инфраструктура која во моментов не може да се поправи. Опремата се увезува, а поради санкциите, поправките би можеле да потраат до шест месеци. Фабриката е целосно затворена“, објави на социјалните мрежи Евгениј Солнцев, гувернер на околниот регион Оренбург.
„Се подготвуваме за најлошото можно сценарио и ќе мора да се потпреме на залихите на гориво увезени надвор од регионот“, додаде тој.
Украина ги засили нападите врз руските рафинерии оваа година, предизвикувајќи широк недостиг на гориво.
Солнчев рече дека во моментов работат 80 отсто од 287 бензински пумпи во регионот, а приоритет имаат итните и специјализираните возила.
Тој додаде дека сообраќајната полиција и волонтерите управуваат со текот на сообраќајот додека возачите бараат гориво.
„Иако ситуацијата не е секаде едноставна, таа е податлива. Би сакал да апелирам до секој возач – бидете трпеливи“, рече гувернерот.
Во вторникот, украинската војска соопшти дека ја нападнала рафинеријата Орск, лоцирана во близина на границата со Казахстан, на околу 1.470 километри југоисточно од Москва, и ја запалила.
Фабриката, чиј годишен капацитет на сурова нафта е шест милиони метрички тони, произведува бензин, дизел и воздухопловно гориво, мазут, битумен и други нафтени деривати.
Од друга страна, Русија го нападна најголемото украинско пристаниште за извоз на жито на Дунав, објавија властите во четвртокот, откако претседателот Володимир Зеленски повторно побара од САД ракетни пресретнувачи Патриот.
Преку пристаништето Измаил, во близина на границата со Романија во јужниот регион Одеса, се извезува украинско жито и други производи. Локалните власти известија дека во нападот била оштетена инфраструктура и дека во јужниот дел на градот е изгубена електрична енергија.
Претходно, Украина го нападна Новоросијск, главното руско пристаниште за жито на Црното Море.
Зеленски изјави за Си-Ен-Ен во средата вечерта дека на Украина и требаат најмалку пет отсто од американските залихи Патриоти за да се одбрани од нападите на руски балистички ракети.
„Продадете ни пет проценти за да ја преживееме зимата и да спасите човечки животи. Ако можете, продадете ни десет проценти и ќе ги уништиме руските балистички ракети. Сега имаме еден процент“, рече претседателот.
Само во јули Русија истрела 450 различни ракети кон Украина, од кои повеќе од половина балистички, изјави портпаролот на украинските воздухопловни сили Јуриј Ихнат.
